Thursday, October 13, 2011

மர்மத்தை அறுத்தெறி



ஊரோரத்தின் 
ஒதுக்கப்பட்ட குளக்கரையில் 
நீர் குடித்து கிடக்குது  

அங்கே 
புதர்களில் புறப்படும் 
புகையினில் கருகும் நாற்றம் 
வீட்டின் 
கதவு சன்னலை உடைத்துக்கொண்டு 
 தாயின் கதறல் சப்தம் 

ஊர்கூடி 
பார்க்கும் ஊடகத்தின் ஒளியில்  
காட்சிப் பொருளாய் ஒர்நிழல் 

நித்தம் 
நாளிதழிலும்  ஊடகத்திலும் 
நெஞ்சைக் கீறும் செய்திகள் 

குளக்கரையில் 
 நீர் ஊறி விறைத்த
அழுகிய உடல் 

புதரில் 
பாதி வெந்த நிலையில் 
உருவம் சிதைந்த உடல் 

வீட்டின் 
அந்தரக் கயிற்றுச் சுருக்கில் 
பிடைபிடைத்து மடிந்த உடல் 

ஊடகத்தில் 
ஊர்பயல்கள் தின்று கக்கிய 
சக்கையாக உயிருள்ள சவம் 

இங்கே 
அழுகியும் 
கருகியும் 
சுருக்கிலும் 
உயிர் சவமாயும் 
மடிந்து கிடப்பதும் நிற்பதும் 
பால்யம் தாண்டாத பெண்சிசுக்கள் 

குழந்தைகள் 
தெய்வத்திற்கு சமம் என்னும் 
இந்த பாரத திருநாட்டில்  
கற்ப்பு இழந்து மடிகிறது 
குழந்தை தெய்வங்கள் 

உயிர்குடித்த 
அரக்க ஜந்துக்கள் 
பயமின்றி  சிறைவேலிக்குள்ளும்
சிலது மான்ய முகமூடியிட்டும் 
உயிருடன் திரிகிறது 

நீதிக்கு கண்ணில்லையோ 
சட்டத்திற்கு ஆண்மையில்லையோ 
வாழும் மனிதசவங்களுக்கு உணர்ச்சியில்லையோ 
இறைவனுக்கும்   கருணை இல்லையோ 

பட்ட காயம் ஆறும்முன் 
மீண்டும் மீண்டும் ஆயுதமிறக்கி
அறாப் புண்ணாய் ரணப்படுகிறது 
சமூக நெஞ்சு 

காம இச்சிக்குள் 
சிதைந்து மடிந்த ஜீவன்களின் 
ஆத்ம சாந்திக்காவது 
சிதைதவனின் மர்மத்தை 
அறுத்து வீதியில் எறியத்துனியட்டும்
நாளை சமூகம் 

1 comment:

  1. அறுத்து எரிவதே நாட்டுக்கு நல்லது...

    ReplyDelete

LinkWithin

Related Posts Plugin for WordPress, Blogger...